എംഎൽഎമാർക്കും മന്ത്രിമാർക്കും ശമ്പളവർധന; തദ്ദേശ ജനപ്രതിനിധികളുടെ ഓണറേറിയവും കൂട്ടാൻ സർക്കാർ

തിരുവനന്തപുരം: എംഎൽഎമാരുടെയും മന്ത്രിമാരുടെയും ശമ്പളവും പെൻഷനും വർധിപ്പിക്കുന്ന ബില്ലുകൾ നിയമസഭ പാസാക്കിയതിന് പിന്നാലെ തദ്ദേശസ്ഥാപനങ്ങളിലെ ജനപ്രതിനിധികൾക്കും ഓണറേറിയം വർധിപ്പിക്കാൻ സർക്കാർ ഒരുങ്ങുന്നു. പുതുക്കിയ നിരക്കിലുള്ള ഓണറേറിയം അടുത്ത വർഷം ജനുവരി ഒന്നുമുതൽ നൽകാനാണ് നീക്കം. ഓണറേറിയം വർധന പരിശോധിക്കാൻ കഴിഞ്ഞ ജൂലൈയിൽ സമിതിയെ നിയോഗിച്ചിരുന്നുവെന്ന് തദ്ദേശ സ്വയംഭരണ വകുപ്പ് മന്ത്രി കെ.എം. ഷാജി നിയമസഭയിൽ വ്യക്തമാക്കി. സമിതിയുടെ ശുപാർശകൾ ഉൾപ്പെടെ പരിശോധിച്ച ശേഷമായിരിക്കും അന്തിമ തീരുമാനമെന്നും അദ്ദേഹം അറിയിച്ചു. നിലവിൽ തദ്ദേശസ്ഥാപന അംഗങ്ങൾക്ക് ലഭിക്കുന്ന ഓണറേറിയം അപര്യാപ്തമാണെന്നും മന്ത്രി ചൂണ്ടിക്കാട്ടി.

അതേസമയം, മന്ത്രിമാരുടെയും എംഎൽഎമാരുടെയും ശമ്പള പരിഷ്കരണ ബില്ലും എംഎൽഎമാരുടെ പെൻഷൻ വർധന ബില്ലും നിയമസഭ അംഗീകരിച്ചു. ബില്ലുകളെ പ്രതിപക്ഷം എതിർത്തില്ല. 2018ലാണ് അവസാനമായി ശമ്പള പരിഷ്കരണം നടപ്പാക്കിയതെന്ന് സ്പീക്കർ തിരുവഞ്ചൂർ രാധാകൃഷ്ണൻ പറഞ്ഞു. സാമ്പത്തിക ബുദ്ധിമുട്ടുകൾ നേരിടുന്ന എംഎൽഎമാർ തങ്ങളുടെ പ്രയാസങ്ങൾ വ്യക്തിപരമായി പങ്കുവച്ചിട്ടുണ്ടെന്നും അദ്ദേഹം വ്യക്തമാക്കി. എംഎൽഎമാർക്ക് ഒരു പേഴ്‌സണൽ അസിസ്റ്റന്റിനെക്കൂടി അനുവദിക്കണമെന്ന് സ്പീക്കർ ആവശ്യപ്പെട്ടു. ഇക്കാര്യം പരിഗണിക്കാമെന്ന് മുഖ്യമന്ത്രി മറുപടി നൽകി. തുടർന്ന് നിയമസഭ അനിശ്ചിതകാലത്തേക്ക് പിരിഞ്ഞു.

നിലവിലെ 70,000 രൂപയിൽനിന്ന് എംഎൽഎമാരുടെ ശമ്പളം 98,000 രൂപയായും മന്ത്രിമാരുടേത് ഒരു ലക്ഷം രൂപയിൽനിന്ന് 1,33,000 രൂപയായും ഉയർത്താനാണ് മന്ത്രിസഭ തീരുമാനിച്ചിരുന്നത്. സാമ്പത്തിക പ്രതിസന്ധിയെ തുടർന്ന് നേരത്തെ മാറ്റിവച്ച ശമ്പള പരിഷ്കരണമാണ് ഇപ്പോൾ നടപ്പാക്കുന്നത്.