‘ഗ്ലോബൽ ഹീറോ’ സ്മിത് മച്ചാറിന് ഇസ്രയേലിന്റെ ആദരം; സ്വാതന്ത്ര്യദിനാഘോഷത്തിലേക്ക് നെതന്യാഹുവിന്റെ ക്ഷണം

ടെൽ അവീവ്: ഫ്ലൈദുബായ് വിമാനത്തിലെ നൂറുകണക്കിന് യാത്രക്കാരുടെ ജീവൻ രക്ഷിച്ച ഇന്ത്യൻ പൈലറ്റ് സ്മിത് മച്ചാറിന് ഇസ്രയേലിന്റെ ആദരം. സ്മിത് മച്ചാറിനെ ‘ഗ്ലോബൽ ഹീറോ’ എന്ന് വിശേഷിപ്പിച്ച പ്രധാനമന്ത്രി ബെഞ്ചമിൻ നെതന്യാഹു, ഇസ്രയേലിന്റെ സ്വാതന്ത്ര്യദിനാഘോഷ ചടങ്ങിലേക്ക് അദ്ദേഹത്തെ നേരിട്ട് ക്ഷണിച്ചു. വിമാനത്തിനുള്ളിൽ സഹപൈലറ്റിന്റെ ആക്രമണത്തിൽ ഗുരുതരമായി പരിക്കേറ്റിട്ടും കോക്ക്പിറ്റിന്റെ വാതിൽ തുറന്ന് യാത്രക്കാരുടെ സഹായം തേടുകയായിരുന്നു സ്മിത് മച്ചാർ. ഇതോടെ യാത്രക്കാർ കോക്ക്പിറ്റിലെത്തി അക്രമിയെ കീഴടക്കുകയും വലിയ ദുരന്തം ഒഴിവാക്കുകയും ചെയ്തു.

സെപ്റ്റംബർ 30ന് ദുബായിൽ നിന്ന് ടെൽ അവീവിലേക്ക് പുറപ്പെട്ട ഫ്ലൈദുബായ് വിമാനത്തിലായിരുന്നു സംഭവം. ഒമാനി സഹപൈലറ്റ് ഹമാം അൽ ഹമാമി സ്മിത് മച്ചാറിനെ ആയുധം ഉപയോഗിച്ച് ആക്രമിച്ചതിനെ തുടർന്ന് വിമാനം നിയന്ത്രണം നഷ്ടപ്പെട്ട് ഏകദേശം 17,000 അടി താഴേക്ക് പതിച്ചതായാണ് റിപ്പോർട്ടുകൾ. ഗുരുതരമായി പരിക്കേറ്റ അവസ്ഥയിലും മച്ചാർ നടത്തിയ ഇടപെടലാണ് യാത്രക്കാരുടെ സുരക്ഷ ഉറപ്പാക്കുന്നതിൽ നിർണായകമായത്. അദ്ദേഹത്തിന്റെ ധീരതയ്ക്ക് പിന്നാലെ ഇസ്രയേൽ പ്രധാനമന്ത്രി നേരിട്ട് ആദരം അറിയിക്കുകയും രാജ്യത്തിന്റെ പ്രധാന ദേശീയ ചടങ്ങിലേക്ക് ക്ഷണിക്കുകയും ചെയ്തു.

അതേസമയം, ദുബായ് കിരീടാവകാശി ഷെയ്ഖ് ഹംദാനും ആശുപത്രിയിലെത്തി മച്ചാറിനെ സന്ദർശിച്ച് അഭിനന്ദനം അറിയിച്ചു. സന്ദർശനത്തിന് പിന്നാലെ അദ്ദേഹം എക്സിലൂടെ ഇന്ത്യൻ പൈലറ്റിന്റെ ധീരതയെ പ്രശംസിക്കുകയും ചെയ്തു. ഇസ്രയേലിന്റെ സ്വാതന്ത്ര്യദിനാഘോഷത്തിൽ ദീപം തെളിയിക്കുന്ന ചടങ്ങിലേക്ക് സാധാരണയായി ഇസ്രയേൽ പൗരന്മാർക്ക് നൽകുന്ന പ്രത്യേക ആദരമാണ് ഇത്തവണ സ്മിത് മച്ചാറിനും ലഭിക്കുന്നത്. ഇന്ത്യൻ പൈലറ്റിന്റെ ധീരതയ്ക്ക് ലഭിച്ച അന്താരാഷ്ട്ര അംഗീകാരമായാണ് ഈ ക്ഷണം വിലയിരുത്തപ്പെടുന്നത്.