കെപിസിസി അധ്യക്ഷനില്ല; കോൺഗ്രസ് പ്രവർത്തനം സ്തംഭനാവസ്ഥയിലെന്ന് മുല്ലപ്പള്ളി രാമചന്ദ്രൻ
കോഴിക്കോട്: കെപിസിസിക്ക് പുതിയ അധ്യക്ഷനെ നിയമിക്കാത്തതിൽ അതൃപ്തി പ്രകടിപ്പിച്ച് മുതിർന്ന കോൺഗ്രസ് നേതാവ് മുല്ലപ്പള്ളി രാമചന്ദ്രൻ. അധ്യക്ഷന്റെ അഭാവം പാർട്ടിയുടെ പ്രവർത്തനങ്ങളെ പ്രതികൂലമായി ബാധിക്കുന്നുണ്ടെന്നും പുനസംഘടന വൈകാതെ പൂർത്തിയാക്കണമെന്നും അദ്ദേഹം ആവശ്യപ്പെട്ടു. സർക്കാർ അധികാരത്തിലെത്തി അഞ്ച് മാസം പിന്നിട്ടിട്ടും പാർട്ടിയിൽ അനിശ്ചിതാവസ്ഥ തുടരുകയാണ്. നിലവിലെ കെപിസിസി അധ്യക്ഷൻ വൈദ്യുതി വകുപ്പ് മന്ത്രിയുടെ ചുമതല വഹിക്കുന്നതിനാൽ സംഘടനാ പ്രവർത്തനങ്ങൾക്ക് ആവശ്യമായ സമയം നൽകാൻ കഴിയുന്നില്ല. സ്ഥാനം ഒഴിയാനുള്ള സന്നദ്ധത അദ്ദേഹം തന്നോട് അറിയിച്ചിട്ടുണ്ടെന്നും മുല്ലപ്പള്ളി പറഞ്ഞു.
പുതിയ അധ്യക്ഷനെ കണ്ടെത്താനുള്ള ഉത്തരവാദിത്വം കോൺഗ്രസ് ഹൈക്കമാൻഡിനും സംസ്ഥാനത്തെ നേതാക്കൾക്കുമുണ്ട്. എല്ലാവരും കൂടിയാലോചിച്ച് എത്രയും വേഗം തീരുമാനമെടുക്കണം. അധ്യക്ഷനില്ലാത്തതിനാൽ പാർട്ടിയുടെ രാഷ്ട്രീയ നിലപാടുകളും കാഴ്ചപ്പാടുകളും മാധ്യമങ്ങളിലൂടെ യഥാസമയം വ്യക്തമാക്കാൻ കഴിയുന്നില്ലെന്നും അദ്ദേഹം ചൂണ്ടിക്കാട്ടി. ഹൈക്കമാൻഡിന്റെ സംഘടനാ ചുമതലയുള്ള ജനറൽ സെക്രട്ടറിക്ക് കേരളത്തിലെ സാഹചര്യം വ്യക്തമായി അറിയാമെന്നും മുല്ലപ്പള്ളി കൂട്ടിച്ചേർത്തു.
അതേസമയം, സംസ്ഥാന സർക്കാരിന്റെ അഞ്ച് മാസത്തെ പ്രവർത്തനങ്ങളിൽ താൻ സംതൃപ്തനാണെന്നും അദ്ദേഹം പറഞ്ഞു. വികസന കാര്യങ്ങളിൽ സർക്കാർ മികച്ച രീതിയിലാണ് മുന്നോട്ടുപോകുന്നത്. മുഖ്യമന്ത്രിയുടെ ആദ്യ പ്രസംഗം തന്നെ വികസനത്തിനുള്ള വ്യക്തമായ മാർഗരേഖയായിരുന്നുവെന്നും വിവിധ വിഭാഗങ്ങളിൽപ്പെട്ട ജനങ്ങൾ സർക്കാരിന്റെ പ്രവർത്തനങ്ങളിൽ തൃപ്തരാണെന്നും മുല്ലപ്പള്ളി അഭിപ്രായപ്പെട്ടു.
