ശബരിമലയിൽ വെർച്വൽ ക്യൂ വഴി കൂടുതൽ പേർക്ക് ദർശനം; നവംബർ 30 വരെ 5,000 പേർക്ക് അധിക അനുമതി
തിരുവനന്തപുരം: ശബരിമല തീർഥാടകർക്ക് കൂടുതൽ പേർക്ക് ദർശനത്തിന് അവസരമൊരുക്കാൻ വെർച്വൽ ക്യൂ ബുക്കിങ്ങിൽ ഇളവ് വരുത്തി തിരുവിതാംകൂർ ദേവസ്വം ബോർഡ്. നവംബർ 30 വരെ പ്രതിദിനം 5,000 പേർക്ക് അധികമായി ദർശനത്തിന് അനുമതി നൽകാനാണ് തീരുമാനം. നവംബർ 21, 22 തീയതികളിൽ സ്പോട്ട് ബുക്കിങ് വഴിയുള്ള ദർശന അവസരങ്ങളും ആനുപാതികമായി വർധിപ്പിക്കും.
തിരക്ക് നിയന്ത്രിക്കുന്നതിനൊപ്പം കൂടുതൽ തീർഥാടകർക്ക് സുഗമമായി ദർശനം നടത്താനുള്ള സൗകര്യമൊരുക്കുന്നതിന്റെ ഭാഗമായാണ് ബോർഡിന്റെ നടപടി. തീർഥാടകരുടെ സുരക്ഷ ഉറപ്പാക്കാൻ മരക്കൂട്ടം മുതൽ സന്നിധാനം വരെ 2,000 പൊലീസുകാരെ വിന്യസിച്ചതായി പൊലീസ് സ്പെഷൽ ഓഫീസർ ജി. ജയ്ദേവ് അറിയിച്ചു. കരുതൽ സേനാംഗങ്ങളെയും സുരക്ഷാ ക്രമീകരണങ്ങളുടെ ഭാഗമായി നിയോഗിച്ചിട്ടുണ്ട്.
ക്യൂ നിയന്ത്രിക്കുന്നതിനൊപ്പം തീർഥാടകർക്ക് ആവശ്യമായ സുരക്ഷാ നിർദേശങ്ങൾ കർശനമായി നടപ്പാക്കുമെന്നും അദ്ദേഹം വ്യക്തമാക്കി. 14 ഡിവൈഎസ്പിമാരുടെ നേതൃത്വത്തിലാണ് വിവിധ മേഖലകളിൽ പൊലീസുകാരെ വിന്യസിച്ചിരിക്കുന്നത്. ശരംകുത്തിയിൽ 76 പൊലീസുകാരെയും ക്യൂ കോംപ്ലക്സിൽ 118 പേരെയും മരക്കൂട്ടത്ത് 100 പേരെയും വിവിധ ഷിഫ്റ്റുകളിലായി നിയോഗിച്ചിട്ടുണ്ട്. തിരക്ക് നിയന്ത്രിച്ച് തീർഥാടകർക്ക് സുരക്ഷിതമായ ദർശനം ഉറപ്പാക്കുകയാണ് ക്രമീകരണങ്ങളുടെ ലക്ഷ്യം.
