വിമാനം ലാൻഡ് ചെയ്തെന്ന ഇസ്രയേലി യാത്രക്കാരന്റെ അവകാശവാദത്തെക്കുറിച്ച് പ്രതികരിച്ച് ക്യാപ്റ്റൻ സ്മിത് മച്ചാർ
അബുദാബി: ഫ്ലൈദുബായ് വിമാനത്തിൽ സഹപൈലറ്റിന്റെ ആക്രമണത്തിൽ ഗുരുതരമായി പരിക്കേറ്റ ഇന്ത്യൻ ക്യാപ്റ്റൻ സ്മിത് മച്ചാർ, വിമാനം സുരക്ഷിതമായി ലാൻഡ് ചെയ്തെന്ന ഇസ്രയേലി യാത്രക്കാരന്റെ അവകാശവാദത്തോട് പ്രതികരിച്ചത് അത്ഭുതത്തോടെ. ആക്രമണത്തിനിടെ കോക്പിറ്റിൽ കടന്ന് അക്രമിയെ കീഴടക്കിയെന്നും ടെലിവിഷൻ പരിപാടി കണ്ട് വിമാനം നിയന്ത്രിക്കാൻ പഠിച്ചെന്നും അവകാശപ്പെട്ട യാനിവ് ഹയോണിന്റെ വാദമാണ് ക്യാപ്റ്റനെ അമ്പരപ്പിച്ചത്. അബുദാബിയിലെ ആശുപത്രിയിൽ ചികിത്സയിൽ കഴിയുന്നതിനിടെ മാധ്യമങ്ങളോട് സംസാരിക്കുകയായിരുന്നു മച്ചാർ. വിമാനം ലാൻഡ് ചെയ്തത് താനാണെന്ന യാത്രക്കാരന്റെ അവകാശവാദത്തെക്കുറിച്ച് നേരത്തെ അറിവില്ലായിരുന്നുവെന്ന് അദ്ദേഹം പറഞ്ഞു.
ഒരു പ്ലംബർക്ക് വിമാനം ലാൻഡ് ചെയ്യാൻ കഴിയുമോയെന്ന ആശ്ചര്യവും അദ്ദേഹം പ്രകടിപ്പിച്ചു. എയർ ക്രാഷ് ഇൻവെസ്റ്റിഗേഷൻ എന്ന ടെലിവിഷൻ പരിപാടി കണ്ടാണ് വിമാനം നിയന്ത്രിക്കാൻ പഠിച്ചതെന്ന ഹയോണിന്റെ വാദമാണ് ചർച്ചയായത്. ആക്രമണം നടന്ന സമയത്ത് സ്വന്തം ജീവൻ രക്ഷിക്കാനുള്ള ശ്രമത്തിലായിരുന്നു താനെന്നും മച്ചാർ വ്യക്തമാക്കി. ടെൽ അവീവിലേക്ക് 172 യാത്രക്കാരുമായി പറക്കുന്നതിനിടെയാണ് ഒമാൻ സ്വദേശിയായ സഹപൈലറ്റ് ക്രാഷ് ആക്‌സ് ഉപയോഗിച്ച് ക്യാപ്റ്റനെ ആക്രമിച്ചത്. ആക്രമണത്തിൽ ബോധരഹിതനായ മച്ചാറിനെ യാത്രക്കാരും ജീവനക്കാരും ചേർന്നാണ് രക്ഷപ്പെടുത്തിയത്.
തുടർന്ന് ഡ്യൂട്ടിയിലില്ലാതിരുന്ന മറ്റ് ഫ്ലൈദുബായ് പൈലറ്റുമാർ വിമാനം നിയന്ത്രണം ഏറ്റെടുത്തു. സൗദി അറേബ്യയിലെ തബൂക്കിൽ വിമാനം സുരക്ഷിതമായി ഇറക്കുകയായിരുന്നു. ആക്രമണത്തിനിടെ നടന്ന സംഭവങ്ങളും വിമാനം ലാൻഡ് ചെയ്തതുമായി ബന്ധപ്പെട്ട അവകാശവാദങ്ങളും വാർത്തകളിൽ ശ്രദ്ധ നേടിയിരുന്നു.
