ജന്തർ മന്തറിൽ സമരത്തിന് അനുമതി നൽകണം; ഡൽഹി പൊലീസിന് 24 മണിക്കൂർ സമയം നൽകി സിജെപി
ന്യൂഡൽഹി: ഡൽഹിയിലെ ജന്തർ മന്തറിൽ പ്രതിഷേധം സംഘടിപ്പിക്കാൻ അനുമതി നൽകണമെന്ന ആവശ്യവുമായി സിജെപി ഡൽഹി പൊലീസിന് 24 മണിക്കൂർ സമയം അനുവദിച്ചു. പാർലമെന്റ് സ്ട്രീറ്റ് പൊലീസ് സ്റ്റേഷനിലെത്തിയാണ് സിജെപി സഹസംഘാടകനായ അശുതോഷ് റാങ്ക അധികൃതർക്ക് അന്ത്യശാസനം നൽകിയത്. നിശ്ചിത സമയത്തിനുള്ളിൽ പ്രതിഷേധത്തിന് അനുമതി നൽകുന്നതിൽ വ്യക്തത വരുത്തിയില്ലെങ്കിൽ തുടർസമര പരിപാടികളിലേക്ക് കടക്കുമെന്നും സംഘടന മുന്നറിയിപ്പ് നൽകി. പ്രതിഷേധങ്ങൾ സംഘടിപ്പിക്കുന്നതിനായി ഔദ്യോഗികമായി നിശ്ചയിച്ചിട്ടുള്ള സ്ഥലമാണ് ജന്തർ മന്തറെന്ന് അശുതോഷ് റാങ്ക ചൂണ്ടിക്കാട്ടി. ഇവിടെ സമരം നടത്തുന്നതിനുള്ള തീയതി അനുവദിക്കുന്ന കാര്യത്തിൽ പൊലീസ് നിലപാട് വ്യക്തമാക്കണം. ഇതിനായി അടുത്ത 24 മണിക്കൂറിനുള്ളിൽ തീരുമാനമെടുക്കണമെന്നാണ് സിജെപിയുടെ ആവശ്യം.
പ്രതിഷേധത്തിന് അനുമതി ലഭിക്കാത്ത പക്ഷം അടുത്ത ഘട്ട സമരപരിപാടികൾ പ്രഖ്യാപിക്കുമെന്ന് സിജെപി അറിയിച്ചു. സമാധാനപരമായി പ്രതിഷേധം സംഘടിപ്പിക്കാനുള്ള അവകാശം ഉറപ്പാക്കണമെന്ന നിലപാടിലാണ് സംഘടന. അനുമതി സംബന്ധിച്ച കാര്യത്തിൽ പൊലീസ് അടിയന്തരമായി വ്യക്തത വരുത്തണമെന്നും സിജെപി ആവശ്യപ്പെട്ടു. ഡൽഹിയിൽ ഇന്ത്യാ മുന്നണിയുടെ മാർച്ചും വിവിധ സംഘടനകളുടെ പ്രതിഷേധ പരിപാടികളും തുടരുന്നതിനിടെയാണ് ജന്തർ മന്തറിൽ സമരം നടത്താൻ അനുമതി തേടി സിജെപി രംഗത്തെത്തിയിരിക്കുന്നത്. പൊലീസിന്റെ തീരുമാനം എന്തായിരിക്കുമെന്നതും അനുമതി ലഭിച്ചില്ലെങ്കിൽ സംഘടന സ്വീകരിക്കുന്ന തുടർനടപടികളും ശ്രദ്ധേയമാണ്.
